Një debat në distancë është zhvilluar mes analistit Baton Haxhiu, i njohur për afërsinë me Kryeministrin Edi Rama, dhe Zëdhënësit të Presidentit Ilir Meta, Tedi Blushi.
Në emisionin ‘Opinion’, Baton Haxhiu tha se Ilir Meta dhe Sali Berisha naracionin kundër kryeministrit e kanë lidhur me ndryshimin e kufijve të Kosovës.
“Kjo klimë politike është produkt i dy njerëzve, Sali Berishës dhe Ilir Metës.
Këta kanë frikë se bashkimi i Kosovës me Shqipërinë do faktorizojë Ramën ndaj për këtë arsye shkaktuan krizën e brendshme”, tha Baton Haxhiu.
Kundrejt kësaj deklarate ka reaguar Zëdhënësi i Presidentit.
“Shpifjet e zëdhënësit të Stanishiçit sot kundër Presidentit Meta si shkaktar i pengimit të bashkimit të Kosovës me Shqipërinë dhe nxitës i krizës së brendshme në Shqipëri janë të qëllimshme e të pashpresa për ata që duan të kthejnë rajonin tonë në kohët e errëta të urrejtjes ndëretnike dhe duke damkosur shqiptarët si faktor krize e destabiliteti.
Qëndrimet e Presidentit Meta kanë qenë të qarta në interes të stabilitetit rajonal dhe interesit kombëtar të shqiptarëve’, shkruan Tedi Blushi.
