Ervin Salianji, ish-deputet i PD-së, tha se protestat e opozitës do të vijojnë. Salianji tha se nuk mund të ketë qetësia Shqipëria, përsa kohë në këmbë ka një qeveri që vjedh çdo aset të pasurive të vendit.
Salianji theksoi se nga dita e nesërme do të nisë përgatitja e strukturave për protestën e ardhshme, duke shtuar se sot ishte një protestë marshim, më e madhja e 28 viteve të fundit.
“Kauza e opozitës po mbështetet sot nga qytetarët, ndërsa Edi Rama ka mbetur i vetëm”, tha Salianji.
Ish-deputeti theksoi se në protestën e sotme ndaj qytetarëve është përdorur dhunë.
“Ndaj qytetarëve u hodh ujë me ngjyrë të gjelbër, po aq i rrezikshëm sa edhe gazi lotsjellës. Pamë qytetarë të dëmtuar nga gazi dhe uji, qytetarë që u goditën nga policia, apo të tjerë që humbën ndjenjat.
Ata që kanë reaguar sot ndaj qytetarëve që shkuan me duar në xhepa në protestë do të përballen me ligjin, herët apo vonë”, tha Salianji.
Sipas tij, Rama duhet t’i hapë rrugën Shqipërisë, t’i hapë rrugën zgjidhjes politike, duke dhënë dorëheqjen.
