Mijëra qytetarë kanë rrethuar godinën e Kryeministrisë, ndërsa duket se ky ishte skenari i parë i protestës qytetare.
Protestuesit kanë kaluar në rrugën “Ismail Qemal”, anash godinës së Kryeministrisë, për të kaluar më pas përqark godinës, duke synuar rrethimin e saj.
Turma ka kaluar pranë rrethimit metalik rreth kryeministrisë, ndërsa është shënuar edhe përplasja e parë me forcat e rendit, gjatë rrëzimit të rrethimit metalik.
Në drejtim të godinës së Kryeministrisë janë hedhur qese me bojë, tymuese dhe flakadanë, kryesisht nga banorë të unazës së re, që protestojnë prej disa muajsh, në mbrojtje të banesave të tyre.
Koha e fjalëve ka përfunduar! Kështu ka nisur protesta e mijëra qytetarëve kundër qeverisë Rama, ndërsa pjesëmarrësve u është drejtuar ish-deputeti Flamur Noka.
“Ky është një marshim protestë, marshimin revolte ndaj kryebanditit, Rama ik! Populli ka forcë, Rama ti nuk i përfaqëson dot më shqiptarët më, na ndiqni vëllezër. E morët vesh apo jo, na ndiqni, na ndiqni”, tha Noka.
