Kuvendi do të mblidhet nesër në orën 10 :00 në seancë plenare, ndërsa sot në një mbledhje të Grupit Parlamentar socialist janë dhënë garanci dhe siguri për shmangien e përplasjes me protestuesit.
Mësohet se Kryeministri Edi Rama ka dhënë garnci që në protestën e nesërme nuk do të lejohen veprime që cënojnë deputetët, sikundër ndodhi në protestën e fundit, kun ë të paktën dy raste, Blend Klosi dhe Paulin Sterkaj, u tentuan të pengohen nga protestuesit për të hyrë në Kuvend.
Burimet bëjnë të ditur se Rama kërkoi nga ligjvënësit që të jenë në sallën e Kuvendit maksimumi në 09:30, ndërsa Ministrisë së Brendshme i është kërkuar të marrë masa për mospërsëritjen e skenave të një jave më parë.
Sandër Lleshaj, i pranishëm në mbledhjen e Grupit, ka dhënë garanci që deputetëve do t’u garantohet hyrja në Kuvend, si dhe marrjen e masave për shmangien e çdo incidenti mes tyre dhe protestuesve.
Nuk dihet ende se çfarë masash mund të marrë ministri Lleshaj, pasi në dy protestat e fundit, plani i tij ka qenë hedhja e gazit luftarak me tepricë ndaj protestuesve, madje duke krijuar pasoja të rënda në shëndet edhe për ata qytetarë që nuk kanë qenë pjesë e protestës, por kanë kaluar në zonën për rreth.
