Jorida Tabaku, deputete e PD-së, ka reaguar pas protestës së opozitës, e cila zgjati mbi 3 orë përpara selisë së Parlamentit.
Përmes një postimi në rrjet, Tabaku shkruan se sot policia sulmoi përsëri qytetarët për të mbrojtur ato që votën e blerë e konsiderojnë të ligjshme.
“Sot përsëri në protestën para parlamentit policia hodhi gaz lotsjellës dhe helmues tek protestuesit në mënyrë të vazhdueshme dhe në drejtime të ndryshme. U prekën jo vetëm protestuesit, por edhe fëmijët, nxënësit, banorët e lagjes si dhe qytetarët kalimtarë të cilët u helmuan!
Sot policia sulmoi përsëri qytetarët e tij për të mbrojtur ato që votën e blerë e konsiderojnë të ligjshme. Ajo nuk po mbron institucionin, as godinën por ato që vjedhjen e konsiderojnë të drejtë. Mazhoranca mblidhet fshehurazi, ka frikë nga e vërteta që ishte përballë saj. Ajo ikën me vrap apo fshihet pas gazit të policisë pasi ka frikë nga shumica, e cila ka pushtuar rrugën dhe nuk tutet nga helmimi i strukturuar qeveritar.
Ne do të jemi aty. Me qetësi, vendosmëri, me forcën e numrave ndonëse përballë kemi gazin dhe helmet kimike. Shqiptarët po tregojnë se nuk bien dakord as me taksat e larta, as me korrupsionin, as me krimin e drogën. Ne sot po u tregojmë të gjithëve se nuk jemi për një demokraci fasadë. Boja e së cilës ka vite që ka dalë”, shkruan Tabaku.
