Gazetari i TG2, Leonardo Zelino, që arriti të futej mes trafikantëve në Shijak, ku provoi edhe fenomenin e blerjes së votave përmes parave të pista, në një intervistë për Ora Neës ka folur për Shqipërinë, protestën e opozitës dhe shumë tema të tjera.
“Ne pamë imazhe shumë të forta nga protesta e së shtunës së kaluar në Tiranë dhe vendosem të vijmë vetë për të parë se ç’po ndodh. E pasi mbërritëm panë me sytë tanë atë çka po ndodhte në Tiranë.
Erdhëm dhe gjetëm një vend të ndarë fort mes atyre që mbështesin qeverinë dhe atyre që mbështesin opozitën. Dhe më pas vendosëm ta tregojmë këtë përplasje mes dy qëndrimeve dhe të marrim pjesë në protestën e opozitës zhvilluar para godinës së parlamentit”, është shprehur Zelino.
Ai nuk vjen në Shqipëri për herë të parë. Trafiku i lëndëve narkotike ishte shqetësim për fqinjët përtej detit çka bëri që TG2 të ‘zbarkonte’ sërish në Shqipëri në tetor të 2016.
“Në Shqipëri kam ardhur disa herë, për të dëshmuar zhvillimet në vend, si ato të mira e si ato të këqija të lidhura kryesisht me narkotrafikun.
Shqipëria në vitet e fundit ka bërë përparim, ndihet kjo në zhvillim ekonomik dhe atë turistik. Vendi ka ndryshuar, zhvillime këto edhe më të hershme se vitet e fundit në fakt.
Besoj se po ecën përpara drejt së ardhmes dhe këto përplasje mes dy qëndrimeve nuk i bëjnë mirë zhvillimit të saj ekonomik dhe turistik”, është shprehur gazetari italian..
Po përse Italia ka gjithnjë në vëmendje zhvillimet politike që ndodhin në Tiranë?
“Italianët interesohen për çfarë ndodh në Shqipëri sepse shqiptarët janë të shtëpisë në Itali dhe italianët janë të shtëpisë në Shqipëri, jemi kushërinjtë me të afërt, na lidhin shumë gjëra përtej ekonomisë. Italia interesohet shumë si për zhvillimet ekonomike edhe ato politike të Shqipërisë”, shprehet Zelino.
