Kreu demokrat Lulzim Basha në fjalën e tij para protestuesve tha se edhe sot ata që kalojnë ligje anti-kushtetuese për të vjedhur paratë e taksapaguesve, që kanë lidhje me bandat kriminale, mblodhën Kuvendin në mënyrën më tinëzare.
Basha tha se karriget e Kuvendit nuk i takojnë trafikantëve dhe krimit të organizuar, por qytetarëve.
“Ne kishim paralajmëruar protestën tonë ditën e enjte, por ata u mblodhën në mënyrë ilegale, pasi menduan se ne nuk do të mund të mblidheshim bashkë me qytetarët.
Por brenda 1 ore kurrë nuk është mbledhur një numër kaq i madh qytetarësh”, tha Basha.
Në vijim kreu demokrat tha se ne jemi sot me një mesazh të qartë, që është mesazhi i shumicës së shqiptarëve: Edi Rama ti që i ke hequr bukën e gojës shqiptarëve, nuk mund të mbash dot në këmbë Parlamentin që e ke mbushur me kriminelë, të ka ardhur ora të ikësh.
“E kemi nisur këtë betejë pasi luftojmë për vlerat europiane, për zgjedhje të lira dhe të ndershme, luftojmë për drejtësinë e pakapur, dhe jo për drejtësinë e kapur me synim për të shpëtuar vangjush Dakon, Damian Gjiknurin, Qazim Sejdinin”, tha Basha. Sipas tij, kjo betejë do të çlirojë vendin nga klika mafioze, do të çlirojë socialistët e ndershëm nga banda kriminale e Edi Ramës.
“Ju që qëndroni mes hajdutëve dhe kriminelëve në atë godinë dhe popullit në anën tjetër, bëni detyrën: arrestojeni ato, para se ti arrestojë populli i bashkuar”, iu drejtua Basha, punonjësve të policisë, duke shtuar se “kupa është mbushur, me Edi Ramën, nuk do të ketë as paqe, as stabilitet, as integrim”.
