A do të rikandidojë Vangjush Dako për një mandat tjetër në krye të bashkisë së Durrësit?
Ndërkohë që ende nuk ka një zyrtarizim të kandidaturave të mazhorancës për zgjedhjet vendore të 30 qershorit, duket se Dako konsiderohet si një nga figurat qendrore të PS-së në qytetin e dytë më të madh të vendit, Durrësin.
Taulant Balla, Sekretar i Përgjithshëm i PS-së, tha se në momentin e duhur do jetë Dako dhe Kryesia e PS që do të shprehen nëse ai do të rikandidojë apo jo.
“Edhe nëse Dako nuk do të ishte më në bashkinë e Durrësit do të mbetet një njeri i rëndësishëm në Durrës dhe do të vijojë jetën e tij politike në mbështetje të PS”, u shpreh Balla në emisioni “Kjo Javë”.
Pak kohë më parë, Balla fliste me siguri të plotë se Dako në Durrës, Veliaj në Tiranë dhe Sejdini në Elbasan do të rikandidohen për një tjetër mandat. Por duket se kryebashkiakët Sejdini dhe Dako nuk do të jenë në listat e kandidatëve, ndërsa Veliaj pret konfirmimin.
