Ish-Kryeministri Sali Berisha tha se shqiptarët janë përpara disa zhvillimeve të mëdha dhe thelbësore. Berisha tha se në Shqipëri, shqiptarët për shkak të një regjimi të lidhur me trafiqet, do të përballen me mbylljen e tretë të dyerve nga Europa.
Sipas tij, regjistrimet e publikuara nga Zëri i Amerikës, tregojnë qartazi se këta janë të lidhur me krimin dhe janë vendosur në funksion të tij. “Maduro po përmbyset sepse manipuloi zgjedhjet, para 1 viti i manipuloi dhe sot venezuelianët janë ngritur në protesta, derdhën edhe gjak, për të mbrojtur votën.
Marrëveshja e 17 majit kishte vetëm 1 qëllim, të krijonte një klimë për zgjedhjet. Por e kam thënë dhe i qëndroj: pa rrëzuar Edi Ramën nuk do të ketë zgjedhje të lira dhe të ndershme. Një marrëveshje tjetër me Ramën do të ishte vetëvrasëse.
Ka vetëm një skenar që mund të kthejë votën në Shqipëri, ai është skenari venezuelian. Shqiptarët nëse nuk do të sakrifikojnë atëherë do të kenë vetëm një rrugë, largimin nga Shqipëria”, tha Berisha, duke shtuar se edhe ai do të bënte marrëveshjen me Ramën.
