Greqia ka shpallur zyrtarisht në kërkim të ashtuquajturin “Escobari i Ballkanit”. CNN grek shkruan se autoritetet helene kanë lëshuar urdhër-arrestin ndaj Balilit, dhe gjatë orëve në vijim do t’i dërgohet Interpolit për t’u shpallur zyrtarisht në kërkim ndërkombëtar.
Balili, ish-drejtori i Transporteve në Sarandë akuzohet si organizator i një rrjeti kriminal të trafikut ndërkombëtar të drogës, konsideruar nga mediat greke si “Baroni i drogës”.
44-vjeçari mundi të largohej nga Shqipëria pa lënë gjurmë, pasi në ditët e para të publikimit të lajmit në mediat greke, ende nuk ishte lëshuar urdhër-arresti për të.
Kërkesa për arrestimin e Balilit për llogari të autoriteteve greke, do t’u dërgohet vendeve të Evropës.
Gjithashtu, një kopje e dosjes së hetimeve nga policia greke në bashkëpunim me DEA-n amerikane, do t’i dërgohet edhe Prokurorisë së Përgjithshme në vendin tonë. Siç edhe shkruan CNN, në të njëjtën kohë, ndaj biznesmenit shqiptar do të ketë edhe një hetim për pasurinë e tij, pasi dyshohet se ka llogari bankare në 10 vende të Evropës.
