Ndodh edhe kështu, një person ka arritur që të vjedh 800 euro brenda ambienteve të Gjykatës së Apelit Administrativ. Autori i dyshuar është vënë në pranga nga ana e policisë e cila është njoftuar nga stafi i Gjykatës sapo kanë kuptuar vjedhjen.
Burime për BoldNews.al kanë siguruar edhe foton e autorit, i cili është futur brenda godinës dhe duke u hequr si punonjës i Gjykatës Administrative e duke shfrytëzuar mungesën e punonjësve të tjerë në zyra ka mundur të marrë shumën e lartpërmendur nga çanta e një sekretareje të Gjykatës.
Sipas policisë autori ka shfrytëzuar momentin që Gjykata e Apelit Administrativ është duke transferuar zyrat nga Gjykata e Apelit Tiranë tek ish-Ministria e Mjedisit në Rrugën e Durrësit, e për këtë arsye niveli i sigurisë ka qenë më i ulët, po ashtu edhe arsyeja e mungesës së punonjësve të Gjykatës.
Pas arrestimit policia ka nisur hetimet rreth ngjarjes, por edhe për arsyen pse sekretarja e Gjykatës Administrative ka pasur një shumë të madhe me vete.
Mësohet se në deponimin e saj në policia ajo ka deklaruar se familja e saj ka një ambient me qira, ku sot ajo ka marrë qiranë e dyqanit dhe për këtë arsye kishte shumën e parave me vete.
