Mark Frroku do të vazhdojë të qëndrojë në burg dhe gjatë periudhës që gjykimi ndaj tij do të zhvillohet nga dhoma penale e kryeqytetit edhe pse ka kaluar afati i paraburgimit.
Gjykata ka pranuar kërkesën e Prokurorisë për të caktuar masën e re “arrest me burg” për ish-deputetin e Kuvendit, Mark Frrokun, ndërkohë që vijon procesi gjyqësor në ngarkim të tij për dosjen e vrasjes në Belgjikë.
Në seancën e sotme, avokatët mbrojtës të Frrokut i kërkuan trupit gjykues lirimin e klientit të tyre, duke argumentuar tejkalimin e afateve për gjykim. I pranishëm në seancë, Mark Frroku përsëriti edhe njëherë se nuk ka asnjë lidhje me vrasjen dhe as me akuzat që ka ngritur ndaj tij Prokuroria.
Madje ai kërkoi ndryshim të masës së sigurisë, duke theksuar se kishte arsye për të kërkuar një gjë të tillë, pasi bashkëshortja e tij vuante nga një sëmundje e rëndë.
Frroku akuzohet për një vrasje në Belgjikë në vitin 1999, vepër penale për të cilën po gjykohet në vendin tonë.
