Ka nisur me tensione seanca e fundit plenare në Kuvend, ndërsa jashtë godinës dhjetëra protestues janë mbledhur për të kërkuar largimin e kastës akutale politike, disa prej të cilëve janë shoqëruar nga policia.
Nga Kuvendi, Agron Shehaj, ka “shpërthyer” ndaj socialistëve për shoqërimin e aktivistit Arben Kola, teksa akuzoi mazhorancën se po përdor policinë ndaj protestuesve.
“Keni arrestuar sot Arben Kolën, 10 policë e morën zvarrë për t’ju mbrojtur ju sepse ai proteston. As këtë nuk e bëjnë dot më tani sepse rrezikojnë burgun. Ndërkohë që kryeministri refuzon të flasë”, deklaroi Shehaj në Kuvend.
Ai vijoi akuzat ndaj qeverisë, duke thënë se masat e larta të sigurisë rreth Parlamentit tregojnë frikë nga përballja me qytetarët.
“Blindoheni këtu sepse nuk dilni dot para protestuesve. Dy muaj protesta”, u shpreh Shehaj ndër të tjera.
