Një nga qytetarët që mori fjalën në protestën e zhvilluar para Kryeministrisë deklaroi se as policia dhe as qeveria nuk do t’i ndalojnë protestuesit në kërkesën e tyre për ndryshim politik.
Nga podiumi, ai iu drejtua edhe deputetit socialist Taulant Balla, duke reaguar ndaj deklaratave të tij, ku protestuesit janë cilësuar si “terroristë”.
“Nuk ka polici dhe deputet që na ndalon në protestën tonë. Nuk mundet një deputet si Taulant Balla të na pengojë të protestojmë prej 54 ditësh apo të qëllojmë me vezë”, u shpreh ai.
Protestuesi shtoi se një shtet që frikësohet nga një akt simbolik proteste nuk mund të funksionojë si një shtet normal.
“Një shtet që ka frikë nga një vezë nuk mund të quhet shtet”, deklaroi ai.
Në përfundim të fjalës së tij, ai u bëri thirrje qytetarëve të vijojnë qëndresën deri në realizimin e kërkesave të tyre, ndërsa i kërkoi Policisë së Shtetit të lirojë të gjithë protestuesit e shoqëruar gjatë tubimeve.
“Lironi çunat dhe lironi gocat”, ishte apeli i tij nga podiumi.
