Dy shtetase të Somalisë janë ndaluar nga autoritetet e Kosovës, pasi dyshohet se kanë hyrë në mënyrë të paligjshme nga territori i Shqipërisë.
Sipas raportit zyrtar të policisë së Kosovës, ngjarja ka ndodhur mbrëmjen e 22 korrikut, rreth orës 23:10, në afërsi të pikës së vjetër kufitare ndërmjet Kosovës dhe Shqipërisë. Gjatë patrullimit në zonë, efektivët kanë hasur dy gra, të cilat pas verifikimeve kanë rezultuar shtetase të Somalisë.
Gjatë intervistimit nga autoritetet, ato kanë deklaruar se e kishin kaluar kufirin në mënyrë ilegale, pa u paraqitur në ndonjë pikë zyrtare të kalimit kufitar. Bazuar në të dhënat e para të hetimit, ekzistojnë dyshime se dy gratë janë transportuar deri në afërsi të kufirit nga persona të tjerë, të cilët mund të jenë të përfshirë në aktivitet të paligjshëm të kontrabandimit të emigrantëve.
Policia e Kosovës ka bërë të ditur se për rastin është njoftuar prokurori kompetent, i cili ka urdhëruar ndërmarrjen e veprimeve të mëtejshme hetimore. Autoritetet po punojnë për identifikimin e personave që dyshohet se organizuan ose lehtësuan kalimin e paligjshëm të kufirit.
