Një rast që ngre pikëpyetje serioze mbi mënyrën se si trajtohen personat me aftësi të kufizuara është denoncuar në redaksinë e emisionit Fiks Fare.
Drejtoresha ekzekutive e një organizate për personat me aftësi të kufizuara në Shkodër, Antonjeta Pera, tregon se gjatë punës së saj në terren ka identifikuar një grua paraplegjike, e cila në vitin 2023 përfitoi KEMP-in me grup të parë dhe shoqërues, pasi lëviz vetëm me karrocë.
Por vetëm një vit më vonë, pagesa iu ndërpre. Arsyeja? Sipas dokumentacionit zyrtar, ajo nuk kishte dorëzuar një skaner.
Vetë pacientja rrëfen se gjatë jetës ka kryer disa skanime, ndërsa hera e fundit i shkaktoi dhimbje të forta dhe një gjendje të rënduar fizike, nga e cila, sipas saj, iu deshën rreth tre muaj për t’u rikuperuar. Ajo shprehet se ka materiale metalike në këmbë dhe refuzon ta përsërisë ekzaminimin vetëm për qëllime administrative.
“Unë nuk lëviz dot. Jam vetëm. Mezi ndërrohem, mezi kujdesem për veten. Fëmijët i kam jashtë shtetit. Kërkoj vetëm atë që më takon”, thotë ajo.
Antonjeta Pera shton se gruaja ka kaluar një jetë sakrificash, duke dhuruar gjak qindra herë për të siguruar të ardhura për familjen, ndërsa sot përballet me humbjen e të vetmes mbështetje ekonomike.
Redaksia e Fiksit u interesua pranë zyrës së Shërbimit Social në Shkodër, ku u konfirmua se vendimi për ndërprerjen e pagesës është marrë nga KEMP-i Epror. Në dokumentacion rezulton se arsyeja është “mungesë dokumentacioni”, konkretisht mosdorëzimi i skanerit.
Ndërkohë, mjeku neurolog Genci Nurja e konsideron të pajustifikuar kërkesën për një ekzaminim të tillë në rastin e një pacienteje me paraplegji kronike.
“Një paciente paraplegjike nuk duhet të detyrohet të bëjë skaner vetëm për të plotësuar dokumentacionin. Skaneri kryhet kur ka indikacion mjekësor, pra nëse ka ndryshim të gjendjes shëndetësore, jo për procedura burokratike. Ajo është paciente kronike dhe kjo gjendje nuk ndryshon”, shprehet neurologu.
Sipas tij, ky nuk është një rast i izoluar, pasi shumë pacientë përballen me të njëjtin problem gjatë procedurave për rivlerësimin e KEMP-it.
Në një përgjigje zyrtare për Fiks Fare , Shërbimi Social Shtetëror konfirmon se pagesa është ndërprerë për shkak të mosdorëzimit të skanerit. Megjithatë, pyetjes nëse komisioni mjekësor e konsideron të shëruar një paciente paraplegjike, institucioni nuk i ka dhënë përgjigje.
Rasti ngre një pyetje thelbësore: a mund t’i hiqet mbështetja financiare një personi me paraplegji kronike vetëm sepse refuzon një ekzaminim që, sipas mjekëve, nuk ka vlerë për përcaktimin e diagnozës së saj?
./TCH
