Kreu i Grupit Parlamentar të Partisë Demokratike, Gazment Bardhi, ka reaguar pas ndalimit në pikën kufitare të disa përfaqësuesve politikë shqiptarë nga Maqedonia e Veriut.
Sipas tij, mes të ndaluarve ishin shefi i Grupit Parlamentar të VLEN-it, Bekim Qoku, deputetët Adnan Azizi dhe Hasim Murtezani, si edhe zëvendëssekretari i përgjithshëm i qeverisë së vendit fqinj.
Bardhi e cilësoi të papranueshme sjelljen e Policisë së Shtetit, duke kërkuar një sqarim të menjëhershëm dhe transparent për ngjarjen.
Ai theksoi se përfaqësuesit e shqiptarëve në Maqedoninë e Veriut duhet të trajtohen me respekt dhe se çdo shkelje e ligjit duhet të hetohet, ndërsa paralajmëroi se raste të tilla dëmtojnë imazhin e Shqipërisë dhe marrëdhëniet mes shqiptarëve në të dy anët e kufirit.
REAGIM I KRYETARIT TË GRUPIT PARLAMEMTAR TË PD, GAZMENT BARDHI
Dënoj me forcën më të madhe sjelljen e Policisë së Shtetit në pikën e kalimit kufitar ndaj disa kolegëve deputetë nga Maqedonia e Veriut, konkretisht ndaj shefit të Grupit Parlamentar të VLEN-it, deputetit Bekim Qoku, deputetëve Adnan Azizi dhe Hasim Murtezani, si dhe ndaj zëvendëssekretarit të përgjithshëm të Qeverisë së Maqedonisë së Veriut.
Asnjë institucion i shtetit shqiptar nuk ka të drejtë të trajtojë në mënyrë denigruese përfaqësuesit legjitimë të shqiptarëve të Maqedonisë së Veriut.
Veprime të tilla janë të papranueshme, bien ndesh me detyrimet kushtetuese të Republikës së Shqipërisë për të mbrojtur dhe respektuar shqiptarët kudo që jetojnë, si dhe cenojnë frymën e bashkëpunimit dhe të respektit që duhet të karakterizojë marrëdhëniet mes dy vendeve tona.
Kërkoj që Policia e Shtetit të japë menjëherë një sqarim publik dhe transparent për këtë ngjarje. Çdo veprim i kryer në kundërshtim me ligjin duhet të hetohet me seriozitet dhe çdo person përgjegjës duhet të mbajë përgjegjësi, pa asnjë hezitim.
Shqipëria duhet të jetë gjithmonë një shtet që i mirëpret, i respekton dhe i mbron shqiptarët, jo një shtet ku ata ndihen të fyer apo të penguar. Kjo nuk është vetëm një çështje ligjore, por edhe një detyrim kombëtar e moral.
Akte të tilla dëmtojnë imazhin e shtetit shqiptar, cenojnë marrëdhëniet mes shqiptarëve në të dy anët e kufirit dhe nuk duhet të përsëriten më kurrë në të ardhmen.
