Një ngjarje e rëndë është shënuar në Ferizaj, ku një 32-vjeçar është gjetur i pajetë në një banesë në rrugën “Sejdi Sejdiu”, rreth orës 22:50 të mbrëmjes së 28 qershorit.
Sipas njoftimit të Prokurorisë, banorët e lagjes kanë dëgjuar të shtëna me armë zjarri para se të konstatohej viktima, e identifikuar si Florim Haxhidema.
Në lidhje me rastin, me vendim të prokurorit është ndaluar për 48 orë një 24-vjeçare e dyshuar për veprën penale “Vrasje”, e cila gjithashtu ka pësuar plagë nga arma e zjarrit dhe ndodhet nën trajtim mjekësor në Prishtinë.
Gjithashtu, në ndalim është marrë edhe babai i saj, deri në sqarimin e plotë të rrethanave dhe rolit të tij të mundshëm në ngjarje.
Trupi i pajetë i viktimës është dërguar në morgun e Prishtinës për ekspertizë mjeko-ligjore.
Prokuroria Themelore në Ferizaj po vijon hetimet për zbardhjen e plotë të rrethanave dhe motivit të ngjarjes, ndërsa si një nga pistat e hetimit përmenden marrëdhëniet e mëparshme mes viktimës dhe autores së dyshuar, si dhe pretendime për konflikt dhe dhunë fizike.
