Deputeti Xhelal Mziu dhe avokati Indrit Sefa kanë debatuar ashpër në lidhje me reformën zgjedhore. Mziu i kujtoi Sefës parlamentin e “kërpëratave” që hoqi koalicionet parazgjedhore dhe tha se me këtë kod zgjedhor nuk vjen dot në pushtet.
“Parlamenti i korporatave hoqi koalicionet parazgjedhore. Në 35 vite asnjë parti politike nuk ka ardhur në pushtet pa koalicione parazgjedhore. Edhe kur erdhi Partia Socialiste në 1997, Partia Demokratike në 2005 dhe PS në 2013 ka ardhur në pushtet me koalicione parazgjedhore. Me këtë kod zgjedhor nuk vjen dot në pushtet”, tha Mziu.
Nga ana tjetër, Sefa kundërshtoi këtë argument dhe tha se PD-ja duhet të fitojë e vetme përballë PS-së dhe jo të mbështetet te partitë aleate.
“Nëse mendoni të fitoni me PR-në apo me agrarët, është muhabet kot. Unë mendoj që PD-ja duhet ta mundë PS-në përballë, jo me bishta”, deklaroi ai.
Debati u tensionua kur Mziu pretendoi se ndryshimet e korrikut 2024 mbyllën listat, çka solli reagimin e Sefës, i cili tha se si ekspert i PD ka kërkuar lista të hapura.
“Po ka qenë e mbyllur lista. A seriozisht e the këtë? E dini shumë mirë edhe ju, edhe PS-ja, se vendimi i Gjykatës Kushtetuese e shfuqizoi. Kur bie primi, listat janë të hapura”, u shpreh Sefa për Off the Record me Andrea Dangllin në A2 CNN.
Ai shtoi se si ekspert i Partisë Demokratike në Komisionin e Reformës Zgjedhore kishte propozuar votim dhe numërim elektronik në të gjithë vendin, si edhe kundërshtimin e votimit me postë, duke paralajmëruar për problematika në proces.
Sipas Sefës, të gjitha propozimet e PD-së për ndryshimet në Kodin Zgjedhor iu janë dërguar anëtarëve të komisionit, ndërsa akuzoi palët politike se nuk kanë reflektuar mbi rekomandimet e ekspertëve.
