Diplomati Agim Nesho, i ftuar në emisionin “Çim Peka LIVE” në Syri TV, ka komentuar zhvillimet e fundit lidhur me qëndrimin e Departamentit të Shtetit ndaj ish-kryeministrit Sali Berisha, duke thënë se po vërehet një ndryshim qasjeje në politikën amerikane.
Sipas tij, rasti i Berishës tregon një reflektim të rëndësishëm të SHBA-së, e cila, siç u shpreh ai, po korrigjon disa vendime të mëparshme në politikën e jashtme. Nesho e krahasoi këtë situatë me raste të tjera ndërkombëtare, duke theksuar se në këtë rast nuk është firmosur një dokument formal për përjashtim, por është krijuar një qasje e re bashkëpunimi.
Ai deklaroi se vendimi për “non grata” ndaj Berishës ka qenë i ndikuar politikisht dhe i lidhur, sipas tij, me zhvillimet e brendshme në Shqipëri, duke përmendur edhe rolin e aktorëve politikë vendas dhe ndërkombëtarë.
Nesho vlerësoi gjithashtu ndryshimet në administratën amerikane, duke theksuar se ato kanë ndikuar në rikthimin e besimit ndaj politikës së jashtme të SHBA-së dhe në, siç tha ai, forcimin e demokracisë shqiptare dhe opozitës.
‘Në rastin e doktor Berishës, Departamenti i Shtetit, politika amerikane ka bërë një hap edhe më tepër sesa ka qenë rasti i heqjes së non-gratës të kryeministrit të Indisë, Modi.
Për arsye sepse atij i është kërkuar vetëm që ‘ti do jesh bashkëpunëtori ynë, je i lirë për të ardhur lirshëm në Shtetet e Bashkuara të Amerikës’, por nuk është firmosur asnjë dokument për përjashtim.
Dhe këtu fillon një reflektim i madh që vetëm një fuqi demokratike si Shtetet e Bashkuara të Amerikës ka për të reflektuar veten e saj. Dihet që ka qenë një aferë korruptive, ka qenë një aferë e sponsorizuar nga njerëz që kërkonin të mbanin pushtetin e tyre, por dhe jo vetëm, që donin të realizonin projekte antikombëtare, siç ishte Ballkani i Hapur, për të realizuar dhe siguruar pozicionet e Ramës dhe të Vuçiçit si të ashtuquajtur elementë stabiliteti në Ballkan.
Pra kjo gjë ka rënë.
Kjo nuk ishte një gjë e paparashikuar që mendojnë disa. Kjo ka qenë një gjë e vonuar duhet të themi, për arsye të lobimit të vazhdueshëm që Edi Rama e ka bërë.
Dhe pse e ka bërë Edi Rama? Për arsye sepse gjithë strategjinë për të mbetur në pushtet, për të përfituar dhe vjedhur popullin shqiptar, e ka bërë pikërisht strategjinë në non-gratën e Sali Berishës.
Ai ishte rezultati i gjithë kësaj politike të përçartë, i krijimit të këtyre partive të vogla të cilët justifikonin veten e tyre pavarësisht se dihej mënyra e orientimit dhe bashkëpunimit.
Dhe duhet të themi një gjë që sekretari Rubio, kjo administrata Trump, edhe në qoftë se më lejoni, dua të bëj një falënderim për largpamësinë e sekretarit të shtetit Rubio, për arsye sepse realizoi ndryshimin e klimës që njerëzit kishin filluar të mos besonin për drejtësinë dhe funksionimin e politikës së jashtme amerikane.
Që ishte marrë nëpër këmbë dhe në kohën e administratës Biden sidomos për Ballkanin ishte dhënë me PPP për njerëz të interesuar për të realizuar skenarët e tyre siç ishte Alex Soros me të tjerë. Pra ka patur vizionin, ka kthyer besueshmërinë dhe dashurinë që populli shqiptar e ka të pakursyer ndaj Shteteve të Bashkuara të Amerikës, dhe së treti ashtu siç po shkëlqen në politikën e jashtme, edhe në këtë rast i ka dhënë një mundësi demokracisë shqiptare të rimëkëmbet duke vendosur vlerat e opozitës shqiptare. Pra mos e mendoni që mund të jetë diçka e shkëputur. Momenti i zgjedhur është plotësisht një moment politik që do t’i shërbejë demokracisë shqiptare.
Dhe duke e përfunduar dua të them një gjë. Kjo ka qenë një goditje tepër e rrezikshme kur pesë vjet përpara me shumë pasoja. Por këtu dua të nënvizoj faktin që vetë unë personalisht kam qenë i frymëzuar nga një intervistë debat që kolegu jonë Çim Peka ka mbajtur po atë mbasdite, ishin në momentet orë pas dizenjimit të liderit të opozitës.
Dhe mendoj që ky kolektiv i mrekullueshëm i Syri Televizion sot përjeton një ditë të satisfaksionit moral për një luftë konsekuente edhe atëherë kur superfuqia më e madhe e botës, e manipuluar nga njerëz me interesa të ngushta siç është Edi Rama dhe grupi i tij, me interesa antikombëtare luftonin për të mbyllur gojën dhe kapjen e shtypit të lirë. Prandaj mendoj që është një moment tepër i rëndësishëm, është një leksion për rezistencën e shtypit të lirë dhe në këtë kuptim mendoj si një njeri i painfluencuar’, u shpreh Agim Nesho.
