Zyra e Shtypit e Departamentit Amerikan të Shtetit ka reaguar lidhur me lajmin për heqjen e masës “non grata” ndaj kreut të Partisë Demokratike, Sali Berisha.
Në një përgjigje për Euronews, Departamenti Amerikan i Shtetit sqaroi se në disa raste janë miratuar përjashtime nga shpalljet e mëparshme të bëra sipas nenit 7031(c), kur një vendim i tillë vlerësohet se i shërben interesit kombëtar të Shteteve të Bashkuara.
“Departamenti i Shtetit ka miratuar përjashtime (waivers) për disa nga shpalljet sipas nenit 7031(c), të vendosura nga administrata e mëparshme, pasi dhënia e këtyre përjashtimeve i shërben një interesi kombëtar bindës dhe të rëndësishëm të Shteteve të Bashkuara”, thuhet në përgjigjen e DASH.
Sipas raportimeve, lajmi i është komunikuar vetë Berishës gjatë një bisede telefonike rreth 15-minutëshe nga e ngarkuara me punë e SHBA-së në Tiranë, Nancy VanHorn, si dhe nga Ambasada Amerikane në Tiranë.
DASH e shpalli Berishën “non grata” në maj të vitit 2021. Vendimi u njoftua asokohe nga ish-Sekretari amerikan i Shtetit, Antony Blinken.
Pas publikimit të lajmit, Berisha hyri në sallën e Kuvendit sot mes duartrokitjeve të deputetëve të opozitës. Nga foltorja ai deklaroi shkurt: “Unë erdha, u krye”, duke konfirmuar se Shtetet e Bashkuara kanë vendosur t’i heqin masën “non grata”.
