Kreu i Partisë Demokratike, Sali Berisha, ka hedhur akuza të forta ndaj qeverisë, duke pretenduar se shuma të mëdha parash publike janë keqmenaxhuar dhe zhdukur pa lënë gjurmë.
Sipas Berishës, gjatë periudhës në detyrë si ministre dhe zëvendëskryeministre, Belinda Balluku ka administruar rreth 12 miliardë euro, ndërsa sipas tij vetëm rreth 1 miliard euro janë reflektuar në investime publike.
Ai ngriti pikëpyetje mbi fatin e pjesës tjetër të fondeve, duke deklaruar se shumë projekte publike kanë dështuar ose janë zhdukur, ndërsa sipas tij qytetarët janë përballur me varfërim në rritje.
Berisha u ndal edhe te çështja e inceneratorit të Tiranës, të cilën e cilësoi si “gropën më të zezë” të korrupsionit në vend. Sipas tij, rreth 130 milionë euro janë zhdukur pa u realizuar asnjë investim konkret, ndërsa pretendoi se fondet janë përfituar nga kompani të lidhura me qeverinë.
Berisha shtoi se, pavarësisht disbursimit të fondeve për disa vite me radhë, në terren nuk ka asnjë vepër të përfunduar, duke akuzuar institucionet se nuk kanë arritur të rikuperojnë asnjë pjesë të këtyre parave.
“Shqiptarët janë plaçkitur nga zyrtarët më të lartë të vendit, asnjë nuk mund të mbyllë gropën më të zezë që ekziston në këtë vend, djegësi i Tiranës. 130 milionë euro të zhdukura pa nam e nishan. Të zhdukura nga një kompani e përzgjedhur nga Edi Rama. E cila, vetëkuptohet, ka marrë vetëm shpërblimin e emrit, se 130 milionë euro i morën ata që i nxorën nga thesari i shtetit dhe i çuan në banka offshore.
Për pesë vite, në këtë vepër publike, pavarësisht se nga fondi i thesarit të vendit disbursoheshin dhjetëra milionë në vit, nuk u hodh asnjë tullë dhe në krye të 6 viteve, nuk ka asnjë themel. Prokuroria nuk ka arritur të gjejë, rikuperojë as edhe një qindarkë.
Nuk është sa i përket vlerës më i madhi djegësi i Tiranës, por është më i dukshmi, më i qarti. Shuma kolosale, qindra e qindra milionë janë vjedhur në vepra të tjera publike. Vetëm Lubi Balluku ka disponuar gjatë periudhës së saj si ministre dhe zëvendëskryeministre, 12 miliardë euro. Në çdo lloj kontrolli nuk shkojnë kurrë më shumë se 1 miliard investime në vepra publike, të cilat janë shembur njëra pas tjetrës, janë zhdukur. Ndërkohë shqiptarët varfërohen çdo vit e më shumë”,- u shpreh Berisha,
