Sali Berisha akuzoi Edi Ramën se jo vetëm mbrojti Belinda Balluku, por tashmë po bën edhe ligje që të zerojë drejtësinë dhe të mbrojë veten e tij.
Teksa renditi denoncimet që opozita i ka bërë në protestat e saj të fuqishme që nga muaji dhjetor në sytë e ndërkombëtarëve, kreu i selisë blu shpjegoi se kjo ka shkaktuar jehonë në mediat ndërkombëtare e jo vetëm.
Ai shtoi se edhe në sytë e botës dhe ndërkombëtarëve, kryeministri që nuk do ketë të ardhme dhe s’do i mbetet resto pa iu kthyer për dhunën ndaj protestuesve, doli si mbrojtës i korrupsionit dhe paligjshmërisë, dhe si armik i drejtësisë.
“Kreu i organizatës kriminale Edi Rama, që megjithë reagimin e shqiptarëve dhe partnerëve ndërkombëtarë, e zeron drejtësinë dhe do të paraqesë ligje për mbrojtjen e vet. Na thoni bashkëqytetarë të dashur, çfarë duhet të bëjmë? Ka vetëm një rrugë, të protestojmë e të protestojmë deri në fitore. Rama dje ka përdorur dhunë, padyshim do i kthehet e gjitha atij, resto s’do i mbetet. Ne në këtë rrugë nuk ka forcë në botë të na ndalë, ne do e rikthejmë Shqipërinë siç e kthyem në vitin 1992, në rrugën e të ardhmes, demokracisë dhe integrimit në BE. Ne do marrim fatin e Shqipërisë në duart tona. Do refuzojmë çdo mashtrim të këtij regjimi dhe do ngrihemi më fuqishëm çdo ditë e më shumë”, tha ai.
Berisha shpjegoi se si e ka nxjerrë në shesh korrupsionin qeveritar, ku e kanë parë qytetarët shqiptarë kudo në botë dhe partnerët ndërkombëtarë.
Ai akuzoi kreun e ekzekutivit se po mbron vartësen Belinda Balluku, të akuzuar për afera nga drejtësia.
“Protestat tona nga dhjetori e deri sot, kohë në të cilën Evropa e Bota e pa se si në Shqipëri zv/kryeministrja ka vjedhur miliona e miliarda me kryeministrin dhe ai e mbron, nuk i heq imunitetin por do të ndryshojë ligjet, por pa një popull e opozitë që nuk pajtohet me vjedhjet e qeveritarëve. Ky është fakti se pse protestat tona përbëjnë lajm botëror, secila prej tyre, çdo protestë mezi pritet nga njerëzit e lirë në mbarë botën, mezi pritet nga shqiptarët, protesta, kryengritje, kryengritje dhe kryengritje paqësore”, vijoi lideri i opozitës fjalën e tij.
Në fund kryedemokrati e mbylli me një apel se opozita do vijojë rrugën e saj të protestave paqësore dhe revoltës qytetare ndaj qeverisë së korruptuar, deri në rrëzimin e saj dhe fitore.
“Kështu që të vazhdojmë të pamposhtur e të palodhur, të vendosur deri në fitoren tonë. Rama të ardhme nuk ka, rrugën e Shqipërisë në BE s’mund ta mbyllë kurrë, ëndrrën e shqiptarëve e fatin e tyre as e shuan dhe as e shkelmon kurrë. Ndaj të gjithë në këmbë e të vazhdojmë betejën tonë deri në fitore”, përfundoi Berisha.
