Një 43-vjeçar shqiptar është arrestuar nga autoritetet italiane pasi akuzohet se ka tentuar të vrasë gruan e tij duke i vënë zjarrin.
Ngjarja është regjistruar në një banesë familjare, pas një konflikti të ashpër mes çiftit që prej rreth 20 vitesh janë të martuar.
Sipas mediave italiane, burri fillimisht ka kërcënuar bashkëshorten me vdekje, më pas ka spërkatur rrobat e saj dhe dyshemenë e kuzhinës me benzinë, duke u përpjekur t’i vërë flakën.
Por ndërhyrja e djalit të tyre të mitur i ka shpëtuar jetën gruas. 15-vjeçari, duke përfituar nga një moment shpërqendrimi, arriti t’i fshehë çakmakun të atit dhe të fitojë kohë derisa në vendngjarje mbërritën karabinierët.
Ishte vetë gruaja që njoftoi policinë, ndërsa djali mbajti larg mjetin ndezës. Policia arrestoi 43-vjeçarin nën akuzën e tentativës për vrasje ndaj bashkëshortes.
Hetimet paraprake tregojnë se kjo nuk ishte hera e parë që burri ushtronte dhunë ndaj gruas, megjithëse nuk kishte pasur denoncime të mëparshme. Pas ndalimit, ai është transferuar në burgun e Venecias, ndërsa procedurat penale vijojnë ex officio pavarësisht padisë së depozituar.
