Reshjet intensive të shiut kanë shkaktuar përmbytje të rënda në zonën e ish-Kënetës në Durrës, duke vënë në vështirësi serioze dhjetëra familje. Uji ka mbuluar rrugët dhe oborret e banesave, ndërsa banorët raportojnë dëme të mëdha materiale dhe rrezik për sigurinë.
Në një prononcim për News24, një prej banorëve ka treguar se është detyruar të lëvizë brenda lagjes me një gomone të vogël, pasi rrugët janë bërë të pakalueshme.
“Situata është katastrofike. Pa këtë gomone nuk dal dot nga shtëpia. Kemi fëmijë të vegjël dhe dëme të mëdha materiale. Është e vetmja mënyrë për të lëvizur,” u shpreh ai.
Ai shtoi se banorët janë të shqetësuar edhe për rrezikun nga energjia elektrike, pasi furnizimi është ndërprerë dhe rikthyer disa herë.
“Kemi frikë nga rryma. Dritat kanë ikur e kanë ardhur. Askush nuk ka ardhur të shohë çfarë po ndodh. Nuk kemi dalë dot as për të parë gjendjen përreth,” tha ai.
