Urdhëri i Stomatologut, nuk të bën stomatolog.
Kjo zonjë, e cila pretendon se është dentiste profesioniste, quhet Genta Elezi Shaholli dhe ka një klinikë stomatologjike në qytetin e Shijakut.
Dhe me një fjali të vetme, sapo na vërtetoi se në qarkullim ka mjekë dhe klinika stomatologjike jashtë juridiksionit të Urdhrit të Stomatologut.
Në realitet, përpara se ta takonim, u interesuam te ky institucion që përfaqëson mjekët stomatologë nga i gjithë vendi, dhe përgjigja nuk linte vend për dyshime:
“Znj. Gentiana Elezi Shaholli nuk rezulton të jetë licensuar si stomatologe pranë Urdhrit të Stomatologut të Shqipërisë.” – thuhet në përgjigjen që na erdhi me shkrim.
Pra, shkurt e qartë: një dentiste e paligjshme, pasojat e së cilës i ka vuajtur kjo 23-vjeçare nga Shijaku.
Një pafundësi problemesh që e kanë alarmuar të renë, e cila është bindur se duhet ndërhyrë urgjent për të sistemuar dhëmbët.
Diçka jo aq e zakonshme në klinikat dentare, por që për vajzën nuk ka krijuar ndonjë problem. Për më tepër që kishte referenca tepër të besueshme.
Dhe meqë në mes ishte mami, dentistja tregohet tepër bujare.
Një ofertë tunduese për një studente, e cila e sheh si një rast për të mos u humbur. Ndaj vajza bën pagesën dhe doktoresha nis punën.
Por me vendosjen e maskerinave, nisin edhe shqetësimet e para. Pacientes vazhdojnë t’i shtohen dyshimet ndaj profesionalizmit të kësaj zonje, e cila ka marrë atributet e stomatologes.
Pseudodentistja kërkon ta qetësojë pacienten dhe ta bindë se gjithçka do të rregullohet, por kjo e fundit duket e vendosur për t’u tërhequr nga ky eksperiment që po bëhej me gojën e saj.
Por edhe pas operacionit që supozohej të kishte bërë, zonja duket se nuk e prish aspak terezinë, pavarësisht se ditët kalojnë.
Këtu duhet të sqarojmë që vajza nuk po kërkon asgjë më shumë sesa lekët e saj. Asnjë dëmshpërblim për dëmin e shkaktuar, edhe pse do të ishte gjëja më logjike. Ndaj dhe në këtë situatë, vajza i drejtohet policisë.
Në fakt, kjo metodë pune e ndjekur nga zonja Genta nuk është e panjohur, pasi në vitin 2023, në një lajm të publikuar, flitet për një rast mashtrimi i cili është hetuar nga Prokuroria e Tiranës, pas denoncimit dhe dënimit të dhënë nga Gjykata e Korçës.
Por me sa duket, nuk ishte e thënë që çdo gjë të ndalej dy vite të shkuara.
Sepse ushtrimi i profesionit të dentistes nga ky person i paautorizuar do të vazhdonte, madje duke shkaktuar probleme serioze te pacientët.
Për të kuptuar më mirë se si procedon kjo zonjë, vendosim të provojmë vetë, nëpërmjet një bashkëpunëtores tonë, e cila hiqet si paciente.
Duhet pranuar që zonja është tepër e komunikueshme dhe e kujdesshme me pacienten e re, të cilës, njëlloj si profesionistët e fushës, më parë i ka kërkuar të kryejë një grafi të dhëmbëve.
Por pasi i jep një diagnozë aspak normale, e cila na alarmoi edhe ne, vendosëm ta dërgojmë menjëherë aktoren tonë në dy klinika të specializuara në Tiranë.
Tani le të kthehemi edhe njëherë te pseudodentistja e Shijakut, e cila me sa duket jo vetëm bën një punë jashtë kapaciteteve të saj, por madje shpik anomali të dhëmbëve te pacientët.
Me 1000% siguri, ditën e premte nisemi sërish drejt Shijakut.
Ndërsa dentistja po shqyrton kërkesën e babait për t’i bërë vajzës 23-vjeçare dhëmbët sipas modelit të propozuar prej tij, në derë papritur shfaqet një mike e paftuar: denoncuesja jonë…
Në fakt, dhëmbët e mamit janë skandali më i vogël në këtë histori abuzimi, e cila nis nga mospasja e licencës dhe vijon me metodat aspak profesionale të kësaj zonje.
Ndaj vendosim ta takojmë vetë nga afër dentisten tonë.
Që në fillim ajo mohon të mos ketë licencë, edhe pse në të gjitha klinikat stomatologjike licenca, diplomat, NIPT-i janë të ekspozuara për pacientët – por jo në rastin e kësaj zonje.
Një individ, pavarësisht shkollimit që ka, nuk mund të ushtrojë funksionin e mjekut stomatolog nëse nuk ka licencë dhe nuk është anëtar i Urdhrit të Stomatologut.
Kjo është e vërteta, ndaj çdo diskutim tjetër nga kjo zonjë është tentativë për të shmangur përgjegjësitë.
Për më tepër që rastet me pacientë të pakënaqur janë të përsëritura.
Përtej paligjshmërisë në ushtrimin e profesionit, kjo zonjë kryen edhe evazion fiskal, pasi qoftë denoncueses, qoftë nënës së saj, nuk i ka dhënë asnjëherë një faturë të rregullt tatimore.
Pasi kemi mbyllur këtë diskutim me pseudodentisten, drejtohemi në Komisariatin e Policisë së Shijakut për të depozituar kallëzim ndaj kësaj shtetaseje.
Dhe reagimi i këtij institucioni ishte i menjëhershëm.
Paralel me këtë, vendosim në dijeni edhe institucionin përgjegjës ISHSH, ku nga kontrolli i tyre rezulton se Genta Elezi Shaholli nuk e disponon lejen e ushtrimit të profesionit.
Sakaq, në mungesë është konstatuar edhe akti i miratimit higjeno-sanitar, libreza shëndetësore, raporti mjeko-ligjor, raporti i analizës së ujit, certifikata e dezinfektimit dhe kontrata e menaxhimit për mbetjet spitalore.
Se çfarë ka pasur të rregullt në këtë klinikë, vetëm mendja e zonjës Genta mund ta dijë; sidoqoftë, rëndësi ka që institucionet reaguan menjëherë.
Në këto kushte, u vendos masa administrative “vendim i ndërmjetëm në marrjen e masës urgjente”, pezullim i aktivitetit për një afat 30-ditor, deri në pajisjen me dokumentacionin ligjor.
