Elbasani u trondit mbrëmjen e së dielës nga një atentat me armë zjarri, ku u ekzekutua biznesmeni 43-vjeçar Mondi Mehalla, i njohur edhe si Edmond Hyka.
Deri më tani, rreth 10 persona janë shoqëruar për t’u marrë në pyetje në lidhje me rrethanat e krimit.
Sipas të dhënave paraprake, Mehalla kishte dalë nga zyra e tij, në godinën ku ndodhen bizneset dhe banesa e nënës së tij.
Pasi u fut në makinë, ai u qëllua me armë zjarri. Hetimet paraprake tregojnë se ai është goditur me tre plumba, dy prej tyre në kokë, duke humbur jetën në vend. Ngjarja po vlerësohet si ekzekutim i mirëorganizuar.
Ndërkohë raportohet se autorët dyshohet të jenë larguar me një automjet tip “Audi” me ngjyrë të zezë, i cili u pa duke u drejtuar me shpejtësi në drejtim të aksit Elbasan–Librazhd.
Mehalla kishte precedentë penal për çështje të narkotikëve dhe armëmbajtje pa leje. Gjithashtu, ai ishte përfshirë në një konflikt gjatë javës së kaluar, pistë që po analizohen si e mundshme në lidhje me motivin e vrasjes.
