Biznesmeni në Orikum, Ardian Nezha, ka folur ditën e sotme në lidhje me prishjet e paligjshme që IKMT ka kryer sipas tij me urdhër të oligarkëve në zonat e Llogarasë Orikumit dhe Radhimës.
Nezha u shpreh se në fillim të muajit shtator IKMT me urdhër të një oligarku nga Golemi, të cilin s’ia përmendi emri, ka prishur dy biznese në zonë pa vendim gjykate.
Ai ka ngritur akuza se shteti është vënë në shërbim të oligarkëve, ndërsa ka paralajmëruar se ditën e hënë rreth 300 persona do të protestojnë para SPAK dhe do të dorëzojnë një padi për qeverinë lidhur me tjetërsimin e pronave.
“Konflikti që ne kemi pas 30 e ca vitesh aktivitete të zonës. Para 3 muajsh janë lajmëruar bizneset e krahinës se do prishin se ka një projekt madhor. Ne s’dinim gjë për këto gjëra dhe kur jemi informuar, kemi bërë verifikime dhe kemi parë që pronat janë tjetërsuar me dokumente false. Me këtë shqetësim kemi që nga gushti.
Në gusht na ka ardhur IKMT-ja. Ishte e papritur. Arsyeja e vendimit është sepse ka projekte të mëdha në zonë dhe se ne duhet të shpronësohemi. Janë projekte madhore të oligarkëve që i di gjithë Shqipëria. Një fakt që e provon edhe këtë, është që në ditët e para të shtatorit IKMT me urdhër të një oligarku nga Golemi, është ngritur nga Tirana, kundrejt një pagese të majme, ma asnjë vendim gjykate, ka ardhur dhe ka prishur dy biznese në zonën tonë. Shteti është vënë në shërbim të oligarkëve. Jemi 82 biznese.
Të gjitha kanë vendim për t’u prishur. Ne kemi dokumente, plus që kemi aktivitete 35 vjet. Kemi dokumentacion që në kohën e Zogut dhe para luftës. Kemi shumë dokumentacione që pronat nuk rezultojnë të jenë të personave që kanë projekte. Kemi informacione, janë publikuar projektet që familja Dulaku në bashkëpunim me të tjerë do ndërtojnë 150 hektarë, ndërtesa 15 katëshe, mbi 22 pallate, ndërtime të mëdha, kundër ekologjisë, ambientit.
Vendimi është i KKRT-së, qeveria. Të hënën do bëjmë padi zyrtarisht me avokatin tonë. Jemi mbi 300 persona që do protestojmë para SPAK-ut dhe do padisim qeverinë, që është pjesë e aferave mafioze. Unë jam i pari që do të jap edhe jetën po të jetë e nevojshme. Jam kërcënuar në telefon me mesazhe me numër anonim. Na kanë thënë se duhet të tërhiqemi vullnetarisht”, është shprehur Nezha në MCN TV.
