30 familje krutane kanë protestuar paraditen e kësaj të marte përpara gjykatës së Apelit, ku kërkuan përshpëjtim të seancave gjyqësore lidhur me një ankim që është depozituar ndaj tyre në këtë gjykatë nga Nikolin Lleshi, person ky që ka humbur betejën ligjore për një çështje pronësie ndaj këtyre familjeve në Gjykatën e Shkallës së Parë në Krujë.
Prej korrikut 2023, këta banorë janë në pritje të nisjes së procesit gjyqsor në Apelin e Tiranës. Vendimi i treshes së gjyqtarëve Suela Lika, Xhevdet Lika dhe Ardit Kuka që i dhanë të drejtë 30 familjeve, duke kaluar në favor të tyre 3 godina pallatesh, u ankimua në Apel nga pala tjetër, nga Nikolin Lleshi.
Prej më shumë se dy vitesh, në Apelin e Tiranës nuk është zhvilluar asnjë seancë gjyqësore, pavarësisht insistimit të vazhdueshëm të familjarëve për shqyrtimin e ankimit, me argumentin se vonesa po i dëmton edhe më shumë ata.
“Kam 35 vite që punoj në Gjermani dhe kam investuar në Shqipëri. Më vjen turp.” tha një qytetar.
Më tej, ai lëshon akuza të forta ndaj sistemit të drejtësisë. “Kemi bërë kallëzim, por prokurorët Florian Bronjaku dhe Florian Boriçi i kanë pushuar çështjet,” deklaron ai.
Sipas tij, edhe pse i janë drejtuar SPAK-ut, çështja është kthyer sërish në Prokurorinë e Tiranës, ku ngec vazhdimisht për shkak të largimit të prokurorëve nga procesi i vetingut. “Florian Boriçit ia kam çuar dosjen llokum në dorë me të gjitha shkeljet e noteres, por ai nuk gjeti asgjë, ndërkohë që Ministria e Drejtësisë i gjeti,” u shprej një qytetar.
Banorët paralajmëruan se në rast se nuk do të ketë asnjë reagim nga gjykata, ata do protestojnë sërish, deri kur të fitojnë drejtësi. Sipas tyre, pavarësisht se gjykata i ka dhënë të drejtë, ata nuk po e gëzojnë pronën prej vitesh.
“Kam blerë një pronë prej 1 mijë metrash katrorë dhe më është marrë krejt padrejtësisht. Nuk kam rrugë tjetër, përveçse të mbroj tokën time. Kush të jetë burrë të hyjë tek kjo prona. Qejf nuk e kemi për t’u vrarë. Por nëse ne po i biem në qafë dikujt, shteti të na arrestojë. Këto letra nuk më hyjnë në punë kërkund, ka mbetur kallashi e të shkojmë të vritemi atje. Por nuk është zgjidhje kjo”– tha një qytetar tjetër.
Kush është Nikolin Lleshi
Nikolin Lleshi është një biznesmen nga Kruja, administrator dhe ortak i kompanisë “Alba Shoes Group”, aktualisht nën hetim nga Prokuroria e Krujës për veprat penale të “Mashtrimit me shuma të mëdha” dhe “Ndërtimit pa leje”.
Sipas dosjes hetimore, ai akuzohet se, së bashku me biznesmenin Arben Kupi, ka mashtruar rreth 20 qytetarë përmes kontratave të shit-blerjes së apartamenteve në një nga pallatet më të larta në qendër të qytetit historik të Krujës.
Të dëmtuarit pretendojnë se kanë paguar shuma që variojnë nga 35 mijë deri në 90 mijë euro, por nuk kanë marrë në dorëzim apartamentet, ndërsa Lleshi i ka regjistruar ato në kadastër në emrin e tij. Në kallëzimin e depozituar në Prokurorinë e Krujës, pesë banorë – Lulzim Kulli, Eduart Salaj, Fatos Spahiu, Iljaz Shuli dhe Zamir Nuna – e akuzojnë Lleshin për ndryshime të paligjshme në planimetritë e pallatit dhe përpjekje për t’i përvetësuar apartamentet përmes dokumenteve fiktive.
Aktualisht, prokuroria ka vendosur sekuestron preventive për dy apartamente.
