Një ngjarje e rëndë ka tronditur mbrëmjen e së shtunës fshatin Gjorm të Vlorës, ku biznesmeni 36-vjeçar Dalan Alliaj u qëllua me armë zjarri dhe humbi jetën. Viktima, pronar i kompanisë Allidagu në Fier, u ekzekutua me gjashtë plumba dhe u gjet i pajetë nga familjarët e tij në prag të shtëpisë.
Policia ka identifikuar autorin e dyshuar si kushëririn e tij, Bertil Alliaj, i dënuar më parë në mungesë për Masakrën e Çoles në vitin 2015. Në atë ngjarje, pas një sherri banal në një kazino, mbetën të vrarë tre të rinj: Akil Hasanaj, Ardi Velaj dhe Albi Limaj.
Bertil Alliaj u dënua me 35 vjet burg në mungesë, por autoritetet nuk arritën ta kapin, gjë që lë të kuptohet dështimi i policisë në ndjekjen e personave të rrezikshëm edhe pas më shumë se një dekade.
Dalan Alliaj u qëllua ndërkohë që ndodhej në shtëpinë e xhaxhait të tij, pranë derës së shtëpisë. Bertil Alliaj dyshohet të ketë ikur në zonat malore të fshatit, ndërsa policia vijon kërkimet.
Forcat e rendit, FNSH dhe ekspertët e kriminalistikës kanë shoqëruar pesë persona për pyetje, përfshirë kryeplakun e fshatit dhe djalin e xhaxhait të viktimës. Trupi i pajetë i Dalan Alliaj është dërguar në morgun e spitalit të Vlorës, ku kanë mbërritur familjarë dhe të afërm.
Ngjarja nxjerr në pah edhe një mangësitë serioze të policisë për të parandaluar veprime të tilla kriminale, sidomos kur bëhet fjalë për persona me histori kriminale, apo aq më tepër të shpallur në kërkim. Edhe pas një dekade nga Masakra e Çoles, autorët e përfshirë ende arrijnë të jenë në arrat.
Ndërkohë, të martën që lamë pas, tre vrasje të tjera për motive të dobëta u regjistruan në qytetet Berat, Tiranë dhe Vlorë.
- Njoftimi i policisë:
Në vijim të informacionit paraprak të dhënë më herët, nga veprimet e para hetimore është bërë e mundur identifikimi i autorit të dyshuar të ngjarjes, shtetasit B. A., i cili dyshohet se në fshatin Gjorm ka vrarë me armë zjarri kushëririn e tij, shtetasin D. A.
Pas kryerjes së krimit, shtetasi B. A. është larguar drejt zonës malore përreth, ku dyshohet se fshihet.
Strukturat e Drejtorisë Vendore të Policisë Vlorë po vijojnë punën intensive për lokalizimin dhe kapjen e autorit të dyshuar, ndërsa nën drejtimin e Prokurorisë vijojnë veprimet hetimore për dokumentimin e plotë të ngjarjes.
