Lulzim Basha ka dëshmuar këtë të enjte në Prokurorinë e Posaçme, në lidhje me ngjarjen tragjike të 21 janarit. Ai u paraqit i vetëm në ambientet e SPAK, më shumë se një vit pas regjistrimit të hetimeve për këtë çështje.
Basha është marrë në pyetje në cilësinë e deklaruesit, pasi ndodhet në listën e personave të kallëzuar nga familja e Aleks Nikës, një prej viktimave të 21 janarit.
Gazetarja e Top Channel, Anila Hoxha, zbuloi në emisionin “Top Story” detaje nga dëshmia e ish-kreut të PD para prokurorëve të posaçëm.
Sipas saj, Basha ka pohuar se nuk ka dhënë asnjë urdhër dhe se ka vepruar në përputhje me detyrën. “Jozyrtarisht më është thënë kjo deklaratë e Bashës, dhe do më duhet ta konfirmoj sërish,” tha Hoxha.
Ajo shtoi gjithashtu se gjatë seancës ka qenë i pranishëm edhe ish-sekretari i përgjithshëm i kryeministrisë, i cili është pyetur për funksionimin e kamerave të sigurisë dhe ka deklaruar se ka zbatuar detyrën si gjithë zyrtarët e tjerë.
