Dy shtetas shqiptarë, Ergis Hoxha 32 vjeç dhe Arbin Hoxha, 34 vjeç, banues në fshatin Manzë, janë arrestuar nga Policia e Durrësit.
Sipas njoftimit zyrtar, të dy vëllezërit ishin shpallur në kërkim ndërkombëtar nga autoritetet italiane, pasi Gjykata e Breshias i akuzon për pjesëmarrje në një organizatë kriminale dhe trafik ndërkombëtar të lëndëve narkotike.
Operacioni u finalizua pas kontrolleve të kryera në bazë të informacioneve operative dhe shkëmbimit të të dhënave me Interpolin.
Arrestimi i tyre është kryer me qëllim ekstradimin drejt Italisë, ku do të përballen me drejtësinë.
