Deputeti i Partisë Demokratike, Xhelal Mziu, ka akuzuar mazhorancën se ka blerë vota me para gjatë zgjedhjeve të 11 majit, duke iu referuar rasteve konkrete të ndodhura në qarkun e Dibrës.
Nga foltorja e parlamentit, Mziu tha se patronazhistët dhe pjesëtarë të administratës publike janë përfshirë në shpërndarjen e zarfeve me para në këmbim të votave, çka sipas tij përbën një manipulim të procesit zgjedhor.
“Në Dibër kapëm më shumë se 7 makina që shpërndanin para për vota. Në një rast u sekuestruan 12 milionë lekë bashkë me lista votuesish, por nuk u mor asnjë masë. Në 2021 pati dënime, ndërsa këtë herë asgjë”, deklaroi deputeti demokrat.
Mziu u shpreh se 40% e administratës publike paguhet vetëm për fushata elektorale, ndërsa pjesa tjetër është vënë në funksion të Partisë Socialiste.
“Një tjetër element për t’u denoncuar është administrata publike. Ku më shumë se 40% e saj nuk vjen në vendin e punës, apo nuk e dinë se kush është pozicioni i tyre i punës, por dinë vetëm kartën dhe bankomatin dhe pastaj të jenë të gatshëm kur të ketë zgjedhje lokale e qendrore. Kjo duhet të jetë pjesë e hetimit nga prokuroria. Kemi dhënë fakte, edhe të personave jashtë shtetit, që kanë ndikuar në farsën elektorale”, përfundoi Mziu.
