Një konflikt i çastit ka përfunduar me dhunë fizike dhe përdorim të armës në lagjen nr. 15 të Durrësit, ku dy persona kanë mbetur të plagosur dhe një 37-vjeçar është arrestuar në flagrancë nga policia.
Sipas njoftimit zyrtar, ngjarja ndodhi rreth orës 08:30 të mëngjesit të sotëm, kur shtetasi K. K., 37 vjeç, ka goditur me sende të forta dy persoa, shtetasit B. Xh., 66 vjeç dhe A. Xh., 61 vjeç të cilët ishin kushërinj me njëri tjetrin.
Gjatë përplasjes, autori dyshohet se ka qëlluar edhe në ajër me një armë me fishekë manovër. Pas arrestimit, u sekuestrua arma me të cilën dyshohet se është qëlluar.
Të dëmtuarit u transportuan në spital dhe ndodhen jashtë rrezikut për jetën.
Njoftimi i policise:
Goditi me sende të forta, për motive të dobëta, 2 shtetas, kapet dhe vihet në pranga, 37-vjeçari.
Sekuestrohet arma me fishekë manovër, me të cilën dyshohet se 37-vjeçari qëlloi në ajër, gjatë konfliktit.
Menjëherë pas njoftimit, rreth orës 08:30, se në lagjen nr. 15, dyshohet gjatë një konflikti për motive të dobëta, shtetasi K. K., 37 vjeç, kishte goditur me sende të forta, shtetasit B. Xh., 66 vjeç dhe A. Xh., 61 vjeç (kushërinj), shërbimet e Komisariatit të Policisë Durrës organizuan punën për kapjen e autorit, si dhe për sqarimin e rrethanave.
Si rezultat i veprimeve të shpejta operacionale, u mundësua arrestimi në flagrancë i shtetasit K. K..
37-vjeçari dyshohet gjithashtu se gjatë konfliktit, ka qëlluar në ajër, me armë me fishekë manovër. Arma u gjet dhe u sekuestrua me cilësinë e provës materiale.
Ndërkohë, 2 të dëmtuarit po marrin asistencë mjekësore dhe janë jashtë rrezikut për jetën.
Materialet procedurale do t’i referohen Prokurorisë së Durrësit, për veprime të mëtejshme.
