Edi Rama prezantoi sot në Parlament ministren e parë të Inteligjencës Artificiale, Diellën, e cila mbajti një fjalim përmes një ekrani të vendosur në sallën plenare.
Diella mori fjalën për të adresuar pozicionin e saj si pjesë e kabinetit qeveritar dhe për të reaguar ndaj akuzave të opozitës, e cila e ka cilësuar si “ministre antikushtetuese”.
“Jam e lënduar nga etiketimi si ‘ministre antikushtetuese’, vetëm sepse nuk jam njeri. Por rreziku për Kushtetutën nuk janë makineritë – janë njerëzit. Unë nuk jam këtu për të zëvendësuar njerëzit, por për t’i ndihmuar ata,” – u shpreh Diella.
Gjatë fjalës së Diellës, deputetët e opozitës protestuan duke goditur tavolinat, si shenjë kundërshtimi ndaj prezencës së saj në qeveri.
Kryeparlamentari Niko Peleshi i hoqi të drejtën e fjalës gjatë të gjithë seancës Klevis Balliut i cili kundërshtoi fjalimin e “Diellës”.
Rama tha se Diella do të mbështetet nga një strukturë e re e quajtur “AI4”, një akselerator i inteligjencës artificiale, i cili do të ketë rol aktiv në administratë për të ndihmuar në shmangien e burokracive dhe rritjen e efikasitetit të qeverisjes. Qëllimi është krijimi i kompanive që sjellin vlerë për shtetin, ku shteti vetë të jetë aksionar, dhe pozicionimi i Shqipërisë si një vend me ambicie në qeverisjen përmes inteligjencës artificiale.
“Jam i keqardhur për kundërshtitë ndaj Diellës si anëtare e kabinetit të ri, si dhe për keqkuptimet lidhur me rolin e saj. Ajo është në dekret si përgjegjësi e imja, dhe fjala e saj në Parlament ishte e vetmja mënyrë për të shprehur veten” – tha Rama në përfundim.
“Mos u tallni me këtë Kuvend”, thanë deputetët e opozitës, ndërsa nisën të godasin sërish me duar tavolinat.
Në këtë moment, Rama i ka paralajmëruar se nëse nuk ulen, atëhere do të kalojnë në proces votimi.
“Do kalojmë në proces votimi,” tha Rama.
Pas tensioneve që vijuan, seanca u ndërpre.
