Policia e Elbasanit ka dalë me një komunikatë për mediat në lidhje me grabitjen nën kërcënimin e armës të një pike karburanti në hyrje të qytetit të Librazhdit, mbrëmjen e djeshme, nga dy persona të maskuar.
Autoritetet policore bëjnë me dije se kanë arrestuar dy autorët, ku nëkuadër të operacionit të koduar “Hijet” janë vënë në pranga shtetasit Denis Isallari, 23 vjeç, dhe Denajd Sterkaj, 19 vjeç, të dy banues në Elbasan.
“Nga veprimet hetimore dyshohet se më datë 15.09.2025, rreth orës 23:00, shtetasit Denajd Sterkaj dhe Denis Isallari, të cilët qarkullonin me një automjet me targa të mbuluara, kanë shkuar në karburantin në hyrje të Librazhdit. Të maskuar dhe me një send të ngjashëm me armë zjarri pistoletë, ata kanë kanosur punonjësin e subjektit, i kanë marrë xhiron ditore dhe janë larguar me shpejtësi.
Pasi janë larguar nga vendngjarja, për të fshehur autorësinë, kanë hedhur në shkurret e fshatit Mirakë sendin e përdorur për kanosje, maskat dhe veshjet e tyre.” – thuhet në njoftimin e autoriteteve.
Policia raporton se ka gjetur sendet e përdorura nga autorët në grabitje, të cilat janë sekuestruar në cilësinë e provës materiale, së bashku me lekët e vjedhura, celularët dhe automjetin e shtetasve të arrestuar.
Materialet procedurale i janë referuan Prokurorisë së Elbasanit për veprat penale “Vjedhje me armë”, kryer në bashkëpunim, dhe “Mbajtja pa leje dhe prodhimi i armëve, armëve shpërthyese dhe municionit”.
