Presidenti i Brazilit, Luiz Inácio Lula da Silva, ka reaguar për herë të parë publikisht ndaj dënimit të ish-presidentit Jair Bolsonaro, duke e cilësuar atë si një veprim të drejtë dhe demokratik, jo si “gjueti shtrigash”, siç është përshkruar nga Donald Trump dhe disa zyrtarë amerikanë. Reagimi i Lulës u bë përmes një editoriali të botuar në gazetën New York Times, të titulluar: “Demokracia dhe sovraniteti brazilian janë të panegociueshme.”
Lula u shpreh “krenar” për vendimin e Gjykatës së Lartë, e cila e dënoi Bolsonaro-n me 27 vite burg për komplot për grusht shteti pas humbjes në zgjedhjet e vitit 2022. Ai theksoi se gjyqi ishte rezultat i muajve të hetimeve dhe jo një akt politik.
“Kjo nuk ishte një ‘gjueti shtrigash‘”, siç e kanë quajtur gjyqin Trump dhe disa zyrtarë amerikanë, shkroi Lula.
Në të njëjtin shkrim, Lula kritikoi edhe administratën e Trump për vendosjen e tarifave të larta doganore ndaj mallrave braziliane dhe për akuzat se Brazili po censuron kompanitë amerikane të teknologjisë. Ai theksoi se vendet duhet të bashkëpunojnë pavarësisht dallimeve ideologjike dhe paralajmëroi se marrëdhëniet 200-vjeçare SHBA–Brazil nuk duhet të rrezikohen për motive politike.
“Përdorimi i veprimeve të njëanshme ndaj shteteve të veçanta është një recetë e gabuar,” tha Lula, duke bërë thirrje për negociata shumëpalëshe.
Mungesa e një logjike ekonomike pas tarifave, shtoi Lula, “tregon qartë se motivimi i Shtëpisë së Bardhë është politik.”
Lula, i cili në moshën 79-vjeçare është vetëm pak muaj më i madh se Trump, tha se e shkroi këtë editorial për të “krijuar një dialog të hapur dhe të sinqertë” me homologun e tij amerikan dhe theksoi se Brazili mbetet i hapur për negociata për çdo çështje.
“Kur Shtetet e Bashkuara i kthejnë shpinën një marrëdhënieje mbi 200-vjeçare, si ajo me Brazilin, të gjithë humbasin,” shkroi Lula.
“Nuk ka dallime ideologjike që duhet të pengojnë dy qeveri të punojnë së bashku në fusha ku kanë qëllime të përbashkëta.”
Që prej kthimit në Shtëpinë e Bardhë në janar, Trump e ka kritikuar vazhdimisht sistemin gjyqësor brazilian për çështjen Bolsonaro-s, e cila ka shkaktuar krizë diplomatike mes dy ekonomive më të mëdha të Amerikës.
Por Lula nguli këmbë se procesi gjyqësor ishte i drejtë dhe gjithëpërfshirës.
“Ai u bazua në muaj hetimesh që zbuluan planet për të më vrarë mua, zëvendëspresidentin dhe një gjyqtar të Gjykatës së Lartë,” tha ai.
Sipas vendimit të Gjykatës së Lartë, plani nuk u realizua për shkak të mungesës së mbështetjes nga udhëheqësia ushtarake.
