Në Tiranë me dhjetëra mijëra banorë nuk furnizohen me ujë për ditë të tëra.
Edhe pse janë ankuar dhe kanë dërguar shkresa në vijimësi nuk kanë marrë zgjidhje. Për më tepër, uji përzihet edhe me ujërat e zeza. Në zonën e Laprakës, është e njëjta situatë.
Në Sauk, në Farkë, Selitë, Kombinat, Kinostudio, në zonën e Freskut, në Ali Dem, ish-Bllok, Bulevardi Zogu i Parë, 21 Dhjetori, Stadiumi Dinamo e në çdo lagje tjetër është i njëjti refren: uji i pijshëm vjen me orar, 3 deri në 5 orë në ditë, oraret askush s’i di të sakta dhe sasia nuk mjafton as për të plotësuar nevojat bazike.
Ndërmarrja e Ujësjellës Kanalizimeve pretendon se ka orare të përcaktuara. Ç’ka do të thotë se i ka të shkruara në dokumente zyrtare. TV Klan i ka kërkuar oraret prej 5 ditësh, por kjo ndërmarrje refuzon t’i bëjë publike, për t’u treguar qytetarëve se kur u vjen uji, kur duhet t’i ndezin pompat apo të lahen.
Mospublikimi i grafikëve ngre dyshime se as oraret e përcaktuara nuk respektohen dhe Tirana nuk furnizohet me ujë aq kohë sa shkruhet në letër.
Mungesa e transparencës dhe moszgjidhja e problemeve çon përditë dhjetëra qytetarë në dyert e zyrave të kësaj ndërmarrjeje, por askush nuk i pret, askush nuk u thotë kur do të kenë ujë në rubinetat e shtëpive të tyre.
Tirana po zhvillohet me shpejtësi, me një numër banorësh rezidentë prej 600 mijë sipas Censit të 2023, me ndërtime prej mijëra metrash katrorë si në lagjet e vjetra, ashtu edhe në zonat periferike që po popullohen me shpejtësi.
Por rrjeti i ujësjellësit ka mbetur në vend numëro, edhe pse kjo është një prej ndërmarrjeve që ka zhvilluar numrin më të madh të tenderave me vlera prej miliona eurosh, por që duhet thënë se nuk e kanë zgjidhur problematikën.
Tirana është kryeqyteti i vetëm në rajon që nuk ka ujë të pijshëm. Ajo është shumë mbrapa të gjitha kryeqendrave të rajonit. Nga 3 – 5 orë furnizim me ujë që ka kryeqyteti shqiptar, Prishtina ka 16 deri në 20 orë, ose 5 herë më shumë. Shkupi, Podgorica, Beogradi, Sarajeva, e çdo kryeqytet tjetër në rajon dhe Europë kanë 24 orë ujë dhe ky shqetësim as nuk është pjesë e problemeve sociale.
Shqipëria synon të jetë pjesë e Bashkimit Europian brenda vitit 2030 dhe e ka projektuar veten si destinacion turistik. Të dhënat tregojnë se Tiranën e vizitojnë miliona turistë çdo vit, por shumë prej tyre vështirë të kthehen kur shohin se nuk kanë as ujë për t’u larë në hotelet apo apartamentet që marrin në Air B&B. /TV Klan
