Një i ri, i shpallur në kërkim ndërkombëtar nga drejtësia shqiptare është arrestuar nga autoritetet policore në Malin e Zi, me qëllim ekstradimin drejt vendit tonë.
Burime zyrtare bëjnë me dije se në pranga është vënë shtetasi Magiljan Deda, 31 vjeç, banues në fshatin Ungrej. Ai ishte shpallur në kërkim që në muajin Prill nga Prokuroria e Lezhës, ku akuzohet për kultivim të bimëve narkotike.
“Ky shtetas ishte shpallur në kërkim ndërkombëtar pasi Gjykata e Shkallës së Parë e Juridiksionit të Përgjithshëm Lezhë, me vendimin e datës 23.04.2025, i ka caktuar masën e sigurisë “Arrest me burg”, për veprën penale “Kultivimi i bimëve narkotike”, kryer në bashkëpunim.
Nga hetimet e kryera në kuadër të operacionit policor të koduar “Vakumi”, i zhvilluar në muajin prill 2025, dyshohet se shtetasi Magiljan Deda, ka bashkëpunuar me 1 shtetas të arrestuar gjatë këtij operacioni, për kultivimin e 1640 bimëve narkotikëve, në fshatrat Gocaj dhe Rraboshte, Lezhë. Gjatë operacionit “Vakumi” janë sekuestruar rreth 34 kilogramë lëndë e dyshuar narkotike cannabis sativa, e paketuar për shitje.” – thuhet në njoftimin e autoriteteve.
Kujtojmë se në kuadër të operacionit “Vakum”, në muajin Prill u arrestuan edhe shtetasit Gjovan Gjini, 46 vjeç, banues në fshatin Rabosht, Agustin Çotaj, 33 vjeç, banues në fshatin Balldre dhe Pashk Ndreca, 31 vjeç, banues në fshatin Ungrej. Ndërkohë, Magiljan Deda, u shpall në kërkim së bashku me shtetasin A. B., 40 vjeç, banues në fshatin Rabosht.
Policia shton më tej se Interpol Tirana, në bashkëpunim me autoritetet e Malit të Zi, po vijon punën për finalizimin e procedurave të ekstradimit të Magiljan Dedës në Shqipëri.
