Ekspozita “Kalorësja e Babunjës”, organizuar nga Ambasada e Shqipërisë në Austri në bashkëpunim me Akademinë e Shkencave në Tiranë dhe Muzeun e Historisë së Natyrës në Vjenë, ka tërhequr 219.397 vizitorë në vetëm tre muaj.
Ambasadori i Shqipërisë në Austri, Fate Velaj, njoftoi këtë shifër përmes një postimi në Facebook, ku shkruan se arritja është fryt i një pune të palodhur për të promovuar trashëgiminë kulturore dhe historike të vendit.
“Ekspozita tregon se ne, Shqiptarët, vijmë nga larg dhe kemi histori të pasur që meriton të shfaqet për botën,” shkroi Velaj.
Figura e bronztë e zbuluar në fshatin Babunjë, e njohur si “Kalorësja e Babunjës”, është konsideruar një nga gjetjet më të rëndësishme arkeologjike shqiptare të viteve të fundit dhe ka tërhequr vëmendjen e publikut dhe mediave ndërkombëtare.
