Ambasadori i Republikës së Shqipërisë në Austri, Fate Velaj ka zhvilluar sot një takim me Kryetarin e Bashkisë së Innsbruckut, Johannes Anzengruber, njëkohësisht anëtar i Këshillit Mbikëqyrës të Aeroportit të Innsbruckut, ku u diskutuan disa iniciativa për forcimin e marrëdhënieve mes Tirolit dhe Shqipërisë.
Sipas njoftimit, në qendër të bisedës ishte mundësia e krijimit të një linje fluturimi charter nga Innsbruck në Tiranë dhe, në një fazë të mëvonshme, edhe drejt Vlorës. Sipas Velajt, kjo do të ndikonte në afrimin ekonomik, turistik dhe kulturor mes dy vendeve.
Gjatë takimit u diskutua gjithashtu edhe organizimi i një programi trajnimi nga Shkolla e Turizmit e Tirolit për Shqipërinë e Veriut, me synimin për të ndihmuar në zhvillimin profesional të sektorit të turizmit.
Një tjetër temë me rëndësi ishte vendosja e një pllake përkujtimore në godinën ku ka jetuar Tahsin Jonuzi gjatë studimeve të tij në Innsbruck. Jonuzi studioi në Universitetin e Innsbruckut në vitet 1932–1937 dhe u nderua me Medalje Ari. Pas kthimit në Shqipëri ai refuzoi bashkëpunimin me pushtuesit gjermanë dhe u deportua në kampin e përqendrimit KZ Mauthausen, ku humbi jetën.
Tahsin Jonuzi njihet gjithashtu si babai i piktorit Nestor Jonuzi.
