Ambasadori i Republikës së Shqipërisë në Austri, Fate Velaj, priti në Ambasadën shqiptare në Vjenë Dr. Bernard Müller, i cili është emëruar Konsull i ri i Nderit i Shqipërisë për Landin e Austrisë së Poshtme.
Gjatë takimit, Ambasadori Velaj vlerësoi angazhimin dhe përvojën e Dr. Müller në jetën politike dhe administrative austriake, duke e konsideruar atë një urë të rëndësishme bashkëpunimi mes Shqipërisë dhe Austrisë.
Dr. Bernard Müller, i lindur në Wiener Neustadt në vitin 1973, ka studiuar shkenca politike në Vjenë dhe ka mbajtur një sërë funksionesh të rëndësishme publike. Ai ka shërbyer si Kryetar i Bashkisë së Wiener Neustadt në periudhën 2005–2015, ndërsa prej vitit 2015 mban detyrën e Sekretarit të Përgjithshëm të Urban Forum për studime bashkiake. Gjithashtu, ai është Zëvendëspresident i BSA Austria dhe President i BSA Niederösterreich.
Në fokus të bisedës mes Ambasadorit Velaj dhe Dr. Müller ishte forcimi i bashkëpunimit ndërmjet Shqipërisë dhe Landit të Austrisë së Poshtme, si dhe identifikimi i mundësive të reja në fushën ekonomike, investimeve dhe bashkëpunimit mes pushteteve vendore.
Palët shprehën gatishmërinë për të intensifikuar kontaktet institucionale dhe për të nxitur projekte konkrete që do të kontribuojnë në zhvillimin e marrëdhënieve shqiptaro-austriake.
