Një ngjarje e rëndë ka ndodhur ditën e sotme në Volos të Greqisë, ku një 40-vjeçar shqiptar, Pandeli Nakoleci, raportohet se ka vrarë gruan e tij 36-vjeçare, Marjola Nakoleci. Pas krimit, autori është arratisur dhe forcat e sigurisë po vijojnë punën për kapjen e tij.
Daja i autorit, Jetnor Lumani, ka folur për TopChannel, duke thënë se ngjarjen e kanë mësuar nga televizori dhe i ka bërë thirrje nipit të dorëzohet në polici. Ai ka deklaruar gjithashtu se 40-vjeçari kishte pasur probleme të shëndetit mendor dhe ishte i trajtuar me kartelë.
Ngjarja ka ndodhur në pallatin ku jeton familja, në rrugën Konstanta. Sherri filloi brenda apartamentit dhe më pas vazhdoi në hyrje të pallatit. Më pas, burri dyshohet se vrau gruan me një objekt të mprehtë dhe u largua nga vendi i ngjarjes. Krimi ka ndodhur në sy të njërit prej katër fëmijëve të çiftit, i cili ka deklaruar se ka parë babain duke therur nënën e tij.
Sipas raporteve të mediave greke, viktima ka vdekur nga gjakderdhja dhe plagët dyshohet se janë shkaktuar nga një thikë ose nga përplasja me xhamin e një dritareje. Autori është përshkruar si tullac, i veshur me pantallona të shkurtra gri dhe bluzë të bardhë, me tatuazh në krahun e djathtë, dhe dyshohet se është larguar në këmbë.
Sipas informacioneve paraprake, nuk ka histori të dhunës së regjistruar më parë në familje. 40-vjeçari dyshohet të ketë përdorur drogë dhe të ketë tentuar vetëvrasje më herët gjatë këtij viti. Një nga vajzat e çiftit ka deklaruar se prindërit kishin grindje të shpeshta dhe se mëngjesin e sotëm shpërtheu një tjetër konflikt, gjatë të cilit babai rrëmbeu një thikë dhe goditi gruan në qafë dhe shpinë.
