Një shqiptar 41-vjeçar, Elton Bani, humbi jetën të dielën në Manesseno, pranë Genovas në Itali, pasi u godit me Taser nga karabinierët gjatë një ndërhyrjeje policore.
Ngjarja filloi rreth orës 17:00, kur fqinjët njoftuan shërbimet e emergjencës për sjelljen e çrregullt të Banit. Fillimisht mbërritën ambulancat, por për të menaxhuar situatën u thirrën karabinierët, raportojnë mediat italiane.
Dy patrulla gjetën Banin në makinën e tij dhe tentuan ta qetësonin. Në shkallët e pallatit, ai u bë agresiv dhe kundërshtoi me forcë. Njëri nga efektivët përdori Taser-in, duke e goditur fillimisht një herë, më pas dy goditje të tjera nga dy karabinierë të ndryshëm. Pas goditjes së tretë, Bani ra përtokë pa ndjenja dhe, pavarësisht përpjekjeve të ndihmës së shpejtë, vdiq pak minuta më vonë.
Prokuroria e Genovas ka hapur hetim për “vrasje nga pakujdesia” dhe ka vënë nën hetim dy karabinierët.
