Presidenti i SHBA-ve, Donald Trump, ka deklaruar këtë të premte, më 1 gusht, se kishte urdhëruar vendosjen e dy nëndetëseve bërthamore në rajone pranë Rusisë, si përgjigje ndaj kërcënimeve të ish-presidentit rus, Dmitry Medvedev.
“Kam urdhëruar që dy nëndetëse bërthamore të vendosen në rajonet përkatëse, për çdo rast, nëse këto deklarata të pamatura dhe provokuese janë më shumë se thjesht fjalë,” shkroi Trump në një postim në rrjetin e tij social, Truth Social.
Sipas Bloomberg, edhe pse Trump nuk dha menjëherë detaje për atë që e nxiti të marrë këtë vendim, postimi i tij është i qartë se ishte pjesë e një shkëmbimi të fundit publik me Medvedevin, i cili aktualisht shërben si zv/kryetar i Këshillit të Sigurisë së Rusisë.
Të enjten e datës 31 korrik, Medvedev paralajmëroi Trump-in të mos harrojë se Moska disponon kapacitete bërthamore të epokës sovjetike si mjet të fundit të goditjes.
Kjo pasi Trump kishte thënë të martën tha se Rusia kishte “10 ditë kohë” për t’u pajtuar për një armëpushim në Ukrainë, përndryshe do të goditej me tarifa doganore, së bashku me blerësit e naftës së saj. Moska, e cila ka vendosur kushtet e veta për paqen në Ukrainë, nuk ka dhënë asnjë shenjë se do t’i përmbahet afatit të Trumpit.
Medvedev është shfaqur si një nga zërat më të ashpër anti-perëndimorë të Kremlinit që kur Rusia dërgoi dhjetëra mijëra trupa në Ukrainë në vitin 2022. Kritikët e Kremlinit e konsiderojnë atë një element të pakontrolluar dhe të papërgjegjshëm, ndërsa disa diplomatë perëndimorë thonë se deklaratat e tij pasqyrojnë mendimin në qarqet e larta të politikës së Kremlinit.
