Të paktën 18 refugjatë kanë humbur jetën dhe rreth 50 të tjerë konsiderohen të zhdukur, pasi një varkë u mbyt pranë brigjeve të Tobrukut gjatë fundjavës. Lajmi u bë i ditur nga Organizata Ndërkombëtare për Migracionin (IOM), e cila citon burime lokale për këtë ngjarje tragjike.
Deri më tani, dhjetë persona janë shpëtuar nga autoritetet. Tobruku, një qytet bregdetar në lindje të Libisë, ndodhet pranë kufirit me Egjiptin.
“Kjo ngjarje e dhimbshme na kujton sërish rreziqet fatale që përballojnë njerëzit që largohen për të kërkuar siguri dhe mundësi më të mira. Libia vijon të jetë një pikë kyçe tranziti për migrantët dhe refugjatët, të cilët shpesh përballen me abuzim, shfrytëzim dhe rreziqe të mëdha gjatë rrugës së tyre,” u shpreh IOM.
Pas rrëzimit të regjimit të Muamar Gadafit në vitin 2011, Libia është kthyer në një nyje të rëndësishme tranziti për mijëra refugjatë që shpresojnë të arrijnë në Europë përmes shkretëtirës dhe Detit Mesdhe, duke ikur nga konfliktet dhe varfëria në vendet e tyre.
