Gjykata Kushtetuese e Kosovës ka marrë një vendim të rëndësishëm lidhur me krizën institucionale që ka përfshirë vendin pas zgjedhjeve të fundit. Në një njoftim zyrtar, Gjykata bëri me dije se ka vendosur një masë të përkohshme që ndalon deputetët e zgjedhur të ndërmarrin veprime për konstituimin e Kuvendit.
Sipas vendimit, ndalimi hyn në fuqi nga data 27 korrik dhe do të zgjasë deri më 8 gusht 2025.
“Më 24 korrik, Gjykata, njëzëri, vendosi të caktojë ex officio masën e përkohshme përmes të cilës ndalohet çdo vendim dhe veprim i deputetëve të zgjedhur të Kuvendit të Republikës së Kosovës lidhur me seancën konstituive pas përfundimit të afatit 30-ditor; të urdhërojë që masa e përkohshme hyn në fuqi më 27 korrik 2025, në kohëzgjatje deri më 8 gusht 2025; t’ua kumtojë këtë vendim palëve; të publikojë këtë vendim në Gazetën Zyrtare dhe që vendimi hyn në fuqi më 27 korrik 2025”, thuhet në komunikatën e Gjykatës Kushtetuese.
Vendimi vjen në një moment të tensionuar politik në Kosovë, ku partitë kryesore ende nuk kanë arritur konsensus për krijimin e institucioneve të reja pas zgjedhjeve parlamentare. Masa e përkohshme synon të ruajë rendin kushtetues deri në shqyrtimin e plotë të çështjes.
