Gjykata Kushtetuese ka shpallur këtë të hënë vendimin për dy kërkesat e paraqitura nga 38 deputetë të opozitës për ngritjen e Komisioneve Hetimore Parlamentare, duke pranuar njërën prej tyre dhe duke rrëzuar tjetrën.
Në vendimin e saj, Kushtetuesja ka rrëzuar kërkesën për ngritjen e Komisionit Hetimor Parlamentar për verifikimin e ligjshmërisë së veprimeve të zyrtarëve shqiptarë në raport me ish-agjentin e FBI-së, Charles McGonigal.
Sipas njoftimit zyrtar, Gjykata Kushtetuese vlerësoi se kërkesa për komisionin hetimor mbi çështjen McGonigal nuk përmbushte kriteret kushtetuese për ngritjen e një komisioni të tillë. Po ashtu, Kushtetuesja nuk arriti shumicën e nevojshme për të vlerësuar kriterin kushtetues të “çështjes së veçantë”, për shkak të qasjeve të ndryshme në arsyetim mes gjyqtarëve.
Ndërkohë, Gjykata ka pranuar kërkesën për ngritjen e Komisionit Hetimor për zgjedhjet e 11 majit 2025, duke argumentuar se kërkesa plotësonte kriteret kushtetuese.
