Një ngjarje e rëndë është denoncuar sot në polici nga Kol Ndoji, 59 vjeç, banues në Rrëshen, i cili pretendon se është dhunuar nga dy persona si pasojë e një përplasjeje të mëparshme gjatë një proteste kundër ndërtimit të HEC-eve në fshatin Arrëz.
Sipas kallëzimit të Ndojit, rreth orës 09:00 të mëngjesit, teksa ndodhej pranë tregut të qytetit për të blerë ushqime, është sulmuar fillimisht verbalish nga një shtetas me mbiemrin Prenga dhe një tjetër që nuk e njihte. Konflikti, sipas tij, lidhet me një episod të ndodhur në prill gjatë protestës ndaj kompanisë “Shperdhaza”, ku kishte pasur një debat me njërin prej sulmuesve.
“Ky më tha ‘A më njeh kush jam unë?’ dhe më qëlloi me grushte bashkë me shokun e tij. Tentova të largohesha me vrap, por më ndoqën me makinë dhe më dolën përpara. Më goditën me gurë dhe i jam përgjigjur po me gurë. Më pas, njëri më tha se ishte i policisë”, tha Ndoji sipas Top Channel.
Ngjarja po hetohet nga Komisariati i Policisë Mirditë, ndërsa autoritetet nuk kanë dhënë ende një reagim zyrtar. Nuk dihet nëse një prej autorëve ka lidhje reale me policinë, siç pretendohet nga denoncuesi.
