Parku Kombëtar i Thethit, një nga zonat më të mbrojtura ligjërisht në Shqipëri dhe simbol i natyrës së paprekur të Alpeve, po përjeton një valë të paprecedentë ndërtimesh pa leje, duke u kthyer në një kantier kaotik ku ligji mungon dhe betonimi i peizazhit është bërë normë.
Pamjet me dron të siguruara nga gazetarët e emisionit investigativ Fiks Fare zbulojnë sesi ndërtimet po përhapen me ritme të frikshme jo vetëm në qendër të fshatit, por edhe në pyjet përreth, në zona të thella dhe të virgjëra. Bujtina, hotele, struktura turistike dhe mure rrethues po ngrihen hapur, në sy të të gjithëve, pa pengesë dhe pa leje.
Gazetarët takuan punëtorë që e pranojnë hapur se po ndërtojnë jashtë ligjit, duke e justifikuar me frazën e zakonshme: “Kështu bëjnë të gjithë”. Në zonat më të izoluara, ku ndërtimet kryhen në pyll, janë vendosur edhe kamera sigurie të fshehura nëpër pemë për të monitoruar lëvizjet dhe për të shmangur inspektimet.
Institucionet? Mjaftohen me letra dhe gjoba që nuk zbatohen.
Inspektori i Policisë së Zonës, i kontaktuar nga gazetarët, pohoi se ka disa procedime penale në vijim për ndërtimet e paligjshme, por shtoi se aktualisht janë të fokusuar tek kontrollet për kultivimin e kanabisit.
Drejtori i IKMT Shkodër pranoi se janë vendosur gjoba dhe se janë referuar raste në prokurori, por refuzoi të dërgojë inspektorë në terren, duke këmbëngulur se çdo reagim do të bëhet vetëm “me shkresë”.
Ndërkohë, Agjencia Kombëtare e Zonave të Mbrojtura në Shkodër konfirmon zyrtarisht se në Theth nuk është dhënë asnjë leje ndërtimi, as për struktura klasike dhe as për ato me dru që shpesh paraqiten si “miqësore me natyrën”. Sipas këtij institucioni, janë vendosur gjoba që kalojnë vlerën e 100 milionë lekëve, por asnjë nuk është ekzekutuar pasi subjektet i kanë çuar në gjykatë.
Në sfondin e një shteti që procedon me ritme burokratike dhe tërhiqet përballë çdo padie, Parku i Thethit po humbet çdo ditë pak nga pak vlerën që e bënte unik: natyrën e paprekur. Priten pyje, hapen rrugë, ndërtohet pa ndalesë. Dhe ndërsa shkelësit e ligjit fitojnë terren, Shqipëria humbet një nga thesaret e saj më të çmuara./Top Channel
